Një përplasje me policinë ka bërë që Kryetari i Alternativës Shqiptare, njëherazi kreu i Komunës së Tuzit në Malin e Zi, Nik Gjeloshaj, të përfundojë në pranga. Siaps gazetës “Vijesti’, Gjeloshaj u arrestua në vazhdën e një përplasjeje verbale me policinë malazeze. Nga Drejtoria e Policisë nuk kanë dashur të komentojnë ngjarjen, por thanë se masat dhe veprimet policore janë në vazhdim e sipër, pas së cilës do të lëshojnë një deklaratë. Majin e një viti më parë, Gjeloshaj iu ankua Shteteve të Bashkuara për diskriminim nga ana e qeverisë malazeze. Ai thoshte atëherë se diskriminimi po ndodhë për faktin se, kjo komunë është me shumicë shqiptare, dhe se atë e qeverisin partitë shqiptarë në bashkëpunim me partinë boshnjake. “Masat e marra ndaj nesh ishin të ngjashme me ato të përdorura nga ish presidenti jugosllav, Sllobodan Milloshevic, shprehej zyrtari shqiptar, duke shtuar se Milloshevici përdorte shtypjen, ndërsa qeveria, rraskapitjen ekonomike ndaj shqiptarëve në mënyrë që ata të mos arrijnë të zhvillohen. Në Malin e Zi, vazhdon të jetë në detyrë qeveria e Dritan Abazovicit pas mocionit të mosbesimit që Parlamenti votoi ndaj ekzekutivit në gusht të këtij viti. Abazovic, që udhëheq Lëvizjen URA, fillimisht pati një qëndrim më pro-perëndimor, por nisi të ndiqte një politikë më pro-serbe kur erdhi në pushtet përmes ndryshimit të koalicionit qeverisës në prill. Në gusht, ai nënshkroi një marrëveshje me Kishën Ortodokse Serbe që nuk njeh identitetin e Malit të Zi si shtet i veçantë, dhe kjo i kushtoi mbështetjen në parlament.