Seanca konstituive e Kuvendit do të thirret brenda afatit të përcaktuar me Kushtetutë, ka deklaruar kryetarja e Kuvendit të Kosovës Albulena Haxhiu, pas certifikimit të rezultateve të zgjedhjeve të 7 qershorit nga Komisioni Qendror i Zgjedhjeve. Përmes një postimi në rrjete sociale, Haxhiu thotë se me certifikimin e rezultateve përfundimtare të zgjedhjeve të 7 qershorit nga KQZ, përmbyllet një proces i rëndësishëm demokratik për Republikën. Ajo ka vlerësuar se vota e qytetarëve, tashmë ka marrë formën përfundimtare institucionale. Duke folur për hapat e ardhshëm, ushtruesja e detyrës së presidentes ka theksuar se formimi i institucioneve të reja duhet të bazohet në përgjegjësi dhe respektim të vullnetit qytetar. “Besimi i dhënë nga qytetarët është një përgjegjësi e madhe. Çdo mandat duhet të ushtrohet me integritet, llogaridhënie dhe përkushtim të palëkundur në shërbim të interesit publik, demokracisë dhe të ardhmes së Republikës sonë”, shkruan Haxhiu. Pas certifikimit të rezultateve, pritet që institucionet e reja të ndjekin procedurat kushtetuese për konstituimin e Kuvendit dhe më pas për krijimin e strukturave të reja qeverisëse.