Agjencia e Ushqimit dhe Veterinarisë ka refuzuar importin e 27 tonëve misër merkantil nga Serbia, pasi analizat laboratorike kanë konstatuar nivel të lartë të aflatoksinës, mbi kufirin e lejuar. Sipas njoftimit të Ministrisë së Bujqësisë, Pylltarisë dhe Zhvillimit Rural, në ngarkesën prej 27 mijë kilogramësh misër, të importuar është konstatuar aflatoksinë në nivel prej 33 mikrogramësh për kilogram, duke tejkaluar kufirin e lejuar prej 20 per kilogram. Sipas njoftimit të Agjencisë së Ushqimit dhe Veterinarisë, rezultati është konfirmuar edhe përmes analizës së realizuar nga laboratori referent në Austri. Pas konstatimit të këtyre rezultateve, AUV ka refuzuar importimin dhe kthimin e të gjithë sasisë në vendin e origjinës. Ministria e Bujqësisë ka bërë të ditur se kontrollet rigoroze ndaj importeve do të vazhdojnë, me qëllim të mbrojtjes së shëndetit të qytetarëve dhe parandalimit të hyrjes në tregun e Kosovës të produkteve që nuk i përmbushin standardet e sigurisë ushqimore. Sipas Ministrisë, kontrollet e intensifikuara do të vazhdojnë me tolerancë zero ndaj produkteve që tejkalojnë kufijtë e lejuar të substancave të dëmshme.