Ushtarët amerikanë të Gardës Kombëtare të Floridas, kanë kryer këtë të premte patrullime të rregullta përgjatë kufirit të Kosovës. KFOR ka publikuar pamje nga patrullimi, duke shtuar se po kujdeset për një mjedis të sigurt për të gjithë njerëzit që jetojnë në Kosovë. “KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si reagues të sigurisë”, thuhet në reagim. Patrullimet vijnë në një kohë kur ushtria serbe nga ana tjetër pak kohë më parë kreu stërvitje ushtarake përgjatë kufirit, duke nxitur tensionet mes dy vendeve.