Kosova ka rinisur fushatën e vaksinimit kundër koronavirusit, pas pranimit të 4,680 vaksinave të kompanisë Pfizer/BioNTech më 4 maj. Procesi i vaksinimit po vazhdon në Sallën 1 Tetori në Prishtinë. Kjo është pjesa e parë e 95,000 dozave që Bashkimi Evropian i ka ndarë për Kosovën, në kuadër të mbështetjes së vaksinimit në vendet e Ballkanit Perëndimor. Ministria e Shëndetësisë e Kosovës ka njoftuar të martën se këto doza do të përdoren për vaksinimin e punëtorëve shëndetësorë, të cilët nuk kanë mundur të vaksinohen në fazën e parë të vaksinimit, për arsye shëndetësore. Para sallës “1 Tetori” është mbledhur një numër i madh i mjekësh dhe infermierësh që prisnin në radhë për t’u vaksinuar. “Nuk e kam marr (AstraZenecën) sepse ashtu më kanë rekomanduar e kam kaluar COVID-in në kohën e fundit dhe më është thënë që duhet të kalojnë disa muaj. Ose duhet të kalohet nëpër COVID që është rrezik për jetën, ose të merret vaksina”