Pas rezultatit të njëjtë në zgjedhjet e 7 qershorit në Kosovë, duke dalë forcë e tretë, në Lidhjen Demokratike të Kosovës janë shtuar pakënaqësitë ndaj udhëheqjes së partisë. Nga dy komunat të udhëhequra nga kjo parti është kërkuar dorëheqja e kryetarit, Lumir Abdixhiku. Pas mbledhjeve të kryesisë së degëve të LDK-së në Pejë dhe Lipjan, të martën, këto dy degë kanë vlerësuar se Abdixhiku nuk duhet të vazhdojë të qëndrojë në krye të partisë. ‘Pas analizës së rezultatit zgjedhor, kërkojmë reflektim politik dhe marrjen e përgjegjësisë nga lidershipi i partisë. Dorëheqja kërkohet si akt moral dhe politik’-thuhet në reagimin e degës së LDK në Pejë. Nga ana tjetër, Dega në Lipjan, ku LDK mban pushtetin vendor ka bërë thirrje për nisjen e një procesi reformimi dhe riorganizimi të partisë në të gjitha nivelet. Nëndega e dytë e LDK-së në Prishtinë ka shtuar se Abdixhikut i janë dhënë mundësi për të rikthyer LDK-në në rrugën e fitores por që rezultati ka munguar. Atij iu kërkua të japë dorëheqjen, në mënyrë që ti hapët rrugë ndryshimeve brenda partisë. Ndërkohë, vet Abdixhiku ka fajësuar kryetarët në degët e Pejës dhe Lipjanit për rezultatin e dobët dhe se kërkon dorëheqjen e tyre. Ai shtoi se ka sabotim brenda partisë. ‘Në asnjë rrethanë nuk do te lejojmë që vullneti i shumicës dërrmuese të LDK-se të tjetërsohet në projekte që synojnë ndarjen e LDK-së’-është shprehur kryetari. Abdixhiku paraqiti dorëheqjen, por jo të pakthyeshme, pas rezultatit të zgjedhjeve të 28 dhjetorit të 2025-tës. LDK mbeti parti e tretë, por krahasuar me zgjedhjet e shkurtit të të njëjtit vit, humbi çerekun e numrit të deputetëve.