Ministria e Industrisë, Ndërmarrësisë, Tregtisë dhe Inovacionit ka gjobitur me 110 mijë euro Kompaninë e Kosovës për shpërndarjen e Energjisë Elektrike për shkak të sahatëve elektrikë të skaduar. MINTI tha se pas ankesave të qytetarëve në muajin maj dhe verifikimeve të kryera është gjetur se 18 sahatë kanë qenë me afat të skaduar të vlefshmrëisë, dy janë tërhequr, ndërsa tek 30 u gjet se kishin pasaktësi në datë dhe orë. Autoritetet thanë se do të vazhdojnë verifikimin e njehsorëve elektrikë edhe në të ardhmen. Edhe në muajt prill, MINTI gjobiti KEDS-in për shkak të sahatëve të skaduar, duke thënë se gjoba për secilin ishte nga 1.500 deri në 5.000 euro. Po në prill, Prokuroria Themelore në Prishtinë e autorizoi Policinë të kryente hetime lidhur me parregullsitë e sahatëve elektrikë. Parregullsitë në sahatët elektrikë u gjetën së pari nga Lidhja Demokratike e Kosovës. KEDS-i ka mohuar se ka bërë shkelje, duke argumentuar se mospërputhjet tek sahatët janë çështje teknike dhe jo manipulim.