Presidentja e Kosovës, Vjosa Osmani, tha se për Kosovën është thelbësore që në procesin e dialogut me Serbinë, të respektohet integriteti territorial dhe Kushtetuta. “Ne presim që procesi të përfundojë me njohjen reciproke, duke i respektuar këto parime, dhe që marrëveshja të jetë plotësisht e zbatueshme”, tha Osmani, duke shtuar se çështja e personave të zhdukur dhunshëm gjatë luftës së fundit në Kosovë, duhet të jetë prioritet në dialog. Osmani i bëri këto komente në një takim që zhvilloi të hënën me përfaqësuesin e posaçëm të BE-së për dialogun Kosovë-Serbi, Mirosllav Lajçak, dhe me të dërguarin e posaçëm të SHBA-së për Ballkanin Perëndimor, Mattheë Palmer. Vizita e tyre në Kosovë po zhvillohet në prag të rifillimit të dialogut midis Kosovës dhe Serbisë. Është paralajmëruar se kryeministri i Kosovës, Albin Kurti, dhe presidenti i Serbisë, Aleksandër Vuçiç, mund të takohen nga mesi i qershorit. Sipas një komunikate të lëshuar nga Zyra e Presidentes, Lajçak dhe Palmer "e ritheksuan edhe një herë mbështetjen e tyre të plotë për procesin e dialogut dhe përmbylljen e tij me marrëveshje përfundimtare ndërmjet Kosovës dhe Serbisë". Osmani po ashtu shprehu mirënjohje ndaj Bashkimit Evropian për dhurimin e vaksinave kundër koronavirusit, dhe shfaqi shpresën se edhe SHBA-ja do të ofrojë vaksina për qytetarët e Kosovës. Lajçak dhe Palmer u takuan më herët edhe me kryeministrin Albin Kurti.