Kurti është i vendosur që gjatë mandatit të tij qeverisës ta padisë Serbinë për gjenocid në Kosovë gjatë periudhës së luftës. Këtë pikë kryeministri i Kosovës e ka përfshirë në programin e vet qeveritar duke thënë, se "çështja e padisë për gjenocid para Gjykatës Ndërkombëtare të Drejtësisë (GJND) do të jetë një nga përparësitë e punës së tij gjatë mandatit qeverisës”. "Ne jemi të bindur që Serbia ka kryer gjenocid në Kosovë në luftën e fundit tek ne dhe kjo e meriton një padi dhe qeveria e Republikës së Kosovës e ka përgatitjen e saj një obligim”, tha kryeministri Kurti pas miratimit të programit të vet qeveritar. Kurti tha se përgatitjet për padi "janë gjigante sepse një rast i tillë nuk mund dhe nuk duhet të humbet”. Paralajmërimi i qeverisë së Kosovës për padi për gjenocid ndaj Serbisë nxiti reagimin e presidentit të Serbisë, Aleksandër Vuçiç, i cili tha se "Kosova nuk mund ta bëjë një gjë të tillë, meqë nuk është anëtare e Organizatës së Kombeve të Bashkuara”. Madje ai i rekomandon Kosovës që mos të provojë ta bëjë një gjë të tillë", duke e cilësuar edhe si kërcënim. " Mund ta realizoni këtë vetëm përmes një shteti tjetër, që është Shqipëria, e kjo do të thotë bashkim me Shqipërinë. U kërkoj shqiptarëve të Kosovës që të mos e bëjnë këtë”, tha Vuҫiq. Edhe ekspertët mendojnë se pa një pajtim me SHBA-në dhe BE-në, padia do të kishte efekte të padëshirueshme. Vec të tjerash, disa mendojnë se kosova nuk është anëtare e OKB dhe formalisht nuk mund ta bëjë këtë. Por edhe nëse do të zgjidhte që ta padiste serbinë për gjenocid, përmes shqipërisë, kjo do të kishte pasoja të tjera. Në 1999, Kroacia ngriti padi ndaj Serbisë në GJND për gjenocid gjatë luftës së viteve 1991-1995. Në 2010, Serbia paraqiti një kundër-padi, duke thënë se rreth 200 mijë serbë etnikë u zhvendosën, kur Kroacia filloi operacionin ushtarak në kërkim të territoreve të pretenduara prej saj. Në 2015 GJND-ja vendosi që as Serbia e as Kroacia, nuk kanë kryer gjenocid ndaj njëra tjetrës. Ndërsa, sa i përket Srebrenicës, në vitin 2007, Gjykata Ndërkombëtare e Drejtësisë në Hagë konstatoi se vrasjet e rreth 8 mijë muslimanëve të Bosnjës atje, kanë përbërë gjenocid, por Gjykata tha, se Serbia nuk e kishte parandaluar gjenocidin e në të njëjtën kohë nuk kishte prova të mjaftueshme që Serbia kishte përgjegjësi të drejtpërdrejt për këtë.