Forcat ajrore të Danimarkës, Finlandës, Suedisë dhe Norvegjisë do të veprojnë së bashku si një njësi e vetme ushtarake. Mediat skandinave raportojnë se komandantët ushtarakë të këtyre vendeve nënshkruan një marrëveshje të përbashkët, për të vepruar si një forcë e vetme ajrore. Marëveshja është firmosur në prani të Komandës Ajrore të NATO-s, në bazën ajrore të Ramsteinit dhe ka për qëllim që forcat ajrore të të katër vendeve fqinje me njëra-tjetrën, të veprojnë si një e vetme. Marrëveshja parashikon trajnime, mbështetje teknike, logjistikë, planifikim dhe ekzekutim të përbashkët të operacioneve. Gjithashtu katër vendet do të monitorojnë së bashku edhe hapësirën ajrore të tyre.