Një inspektor policie është arrestuar në portin detar të Durrësit për marrje ryshfeti. Agjencia e Mbikëqyrjes Policore për Rajoni Durrës-Kavajë ka ekzekutuar vendimin e Gjykatës së Shkallës së Parë Durrës për caktimin e masës së sigurimit “Arrest me burg” për punonjësin e policisë, Inspektor Njazi Rexhepi, 57 vjeç, me detyrë kontrollor në stacionin e policisë së pikës së kalimit kufitar në portin e Durrësit. Inspektori i Policisë i dyshuar për kryerjen e veprave penale “korrupsioni pasiv i personave që ushtrojnë funksione publike” dhe “shpërdorim i detyrës”. Nga hetimet e kryera ka rezultuar se punonjësi i policisë, lejonte hyrje-dalje të shtetasve që kishin ndalesa për udhëtimin në zonën Shengen, në këmbim të vlerave monetare, të cilat varionin nga 50 deri në 100 euro. Këto ndërveprime korruptive kryheshin në mënyrë të vazhdueshme dhe të përsëritur, përfshi edhe raste të lejimit të kalimit të shtetasve të shpallur në kërkim nga organet e drejtësisë, apo automjeteve, pa ju nënshtruar regjimit doganor.