Ka përfunduar procesi i votimit në në përfaqësitë diplomatike të Kosovës në kuadër të zgjedhjeve të parakohshme parlamentare të 7 qershorit. Vendvotimet në përfaqësitë diplomatike dhe konsullore u hapën në orën 07:00 dhe u mbyllën në 19:00, sipas kohës lokale në vendet përkatëse. Sipas Komisionit Qendror të Zgjedhjeve, votimi është organizuar në 30 misione diplomatike, përkatësisht në 17 ambasada dhe 13 konsullata të vendosura në 18 shtete të ndryshme të botës. Procesi ka nisur fillimisht në Turqi, ku ambasada e Kosovës në Ankara dhe konsullata në Stamboll kanë hapur dyert për votuesit e regjistruar. Më pas, votimi vazhdoi në shtete të ndryshme evropiane, përfshirë Gjermaninë, Zvicrën, Mbretërinë e Bashkuar, Belgjikën, Francën, Austrinë por dhe vende të tjera. Sipas KQZ, të drejtë vote në përfaqësitë diplomatike kanë 27.724 shtetas të Kosovës, të cilët janë regjistruar paraprakisht dhe kanë zgjedhur votimin fizik në misionet diplomatike. Po ashtu, është përmbyllur këtë të shtunë edhe procesi i votimit përmes postës për mbi 104 mijë votues të regjistruar jashtë vendit. të gjitha fletëvotimet e mbledhura në ambasada, konsullata dhe përmes postës do të transportohen në Kosovë, ku do të bëhet numërimi i tyre. Këte të diëlë, qytetarët e Kosovës do t’u drejtohen kutive të votimit për të zgjedhur përbërjen e re të Kuvendit dhe qeverinë e ardhshme të vendit.