Shumëkush në kosovë po e sheh ilacin e diabetit, ozempic, si një shans për të humbur kilogramët e tepërt dhe kjo ndodh në një vend ku më shumë se gjysma e popullsisë është mbipeshë. "Dua të humbas 15-16 kilogramë brenda dy muajsh", thotë për AFP-së influencerja 29-vjeçare Tringa Kadriu, "dhe pastaj do të vazhdoj me fitnesin". Ozempic, i miratuar në Shtetet e Bashkuara për të trajtuar diabetin në vitin 2017, ka gjetur një treg ndërkombëtar për njerëzit që përpiqen të humbin peshë. Pavarësisht kostos së tij, ilaçi ka fituar popullaritet në Kosovë, një vend me 1.7 milionë banorë. Ndërsa autoritetet e Kosovës nuk e kanë sanksionuar përdorimin e ilaçit për humbje peshe, ato kanë nxjerrë në pah faktin se kanë mjete të kufizuara për t'u përballur me përdorimin e një ilaçi që është gjerësisht i disponueshëm në vend. Merita Emini-Sadiku, e cila drejton klinikën e endokrinologjisë të spitalit universitar të Kosovës, thotë se kostoja e ilaçit është rritur ndjeshëm. "Doza mujore dikur ishte 75-80 euro, ndërsa tani është 130-140 euro, ndoshta për shkak të kërkesës së lartë", thotë ajo. Por ajo paralajmëroi se "Ozempic ka efekte anësore për të cilat njerëzit nuk janë të vetëdijshëm".