Kreu i LDK-së, Lumir Abdixhiku, ka pranuar rezultatin zgjedhor, duke falënderuar qytetarët e Kosovës për mbështetjen e dhënë. Ai theksoi se LDK-ja ka arritur të sigurojë 20 mandate, rezultat që sipas tij dëshmon forcimin e partisë brenda një kohe të shkurtër. Abdixhiku u shpreh se Kosova vijon të përballet me sfida dhe ka nevojë për stabilitet politik, ndërsa paralajmëroi gjithashtu reforma të brendshme në parti, duke theksuar nevojën për angazhimin e njerëzve që kontribuojnë në vizionin e LDK-së dhe në zhvillimin e saj. Sipas tij, fokusi tani duhet të jetë drejtimi i vendit me maturi, vizion dhe përkushtim për zhvillim. Po ashtu, Abdixhiku përgëzoi të gjitha partitë politike për garën zgjedhore dhe rezultatet e arritura, duke bërë thirrje që rezultati i zgjedhjeve të shfrytëzohet në funksion të interesit të Kosovës. Lëvizja Vetëvendosje u rikonfirmua si forcë e parë me rreth 42,91 për qind të votave, ndërsa Lidhja Demokratike e Kosovës pozicionohet e treta me 17,58 për qind.