Saga gati 7 mujore e konstituimit të Kuvendit të Kosovës jo vetëm që nuk ka përfunduar me zgjedhjen e Dimal Bashës si kryetar, por mund të hyjë në terrene juridike të panjohura deri më tani. Arsyeja është procedura e dyshimtë e ndjekur në zgjedhjen e nënkryetarëve të Kuvendit nga radhët e pakicave, për të cilët nuk u ndoq e njëjta rrugë siç u zgjodhën tre nënkryetarët nga radhët e partive shqiptare. Gjatë votimit, tre nënkryetarët shqiptarë të Kuvendit u miratuan në bllok nga deputetët, duke marrë 101 vota pro. Ndërkohë, dy nënkryetarët nga pakicat, njëri prej të cilëve prej pakicës serbe u hodhën për miratim në dy votime të ndara. Procesi ngeci te përzgjedhja e nënkryetarit nga pakica serbe, pasi asnjëri prej kandidatëve të propozuar nuk siguroi 61 votat në parlament. Ekspertët paralajmërojnë se çështja mund të përfundojë në Gjykatën Kushtetuese dhe të zvarrisë edhe më tej konstituimin e Kuvendit të Kosovës.