Kryeministri në detyrë Albin Kurti ka kritikuar Odën Ekonomike pasi sipsa tij nuk ka bërë asgjë për të përgatitur procesin e liberalizimit të tregut të energjisë. Ndërsa bizneset kanë nisur një protestë duke bllokuar hyrjet e rrugëve në kryeqytet, Kurti tha në mbledhjen e kabinetit qeveritar që ende vijon të jetë në detyrë, se shtryrja e liberalizimit të tregut “nuk i zgjidh” problemet e bizneseve. “Oda Ekonomike e Kosovës, që do të duhej të qëndronte pranë bizneseve për t’u [përballur me realitetin e ri, sot po tenton t’i bllokojë rrugët vetëm me një kërkesë; shtyrjen e zbatimit të liberalizimit të tregut. Shtyrjen po e kërkojnë me arsyetimin se do të përgatiten për një vit, duke injoruar faktin se nga ana e tyre nuk kanë bërë asnjë përgatitje për tetë vjetët e kaluara, përderisa shtyhej ky proces”, tha Kurti ndërsa theksoi se “oda ekonomike e Kosovës nuk po u tregon se plotësimi i kërkesës së tyre nuk e zgjidh problemin, por veçse e bartin koston e energjisë të këtyre 1.200 ndërmarrjeve te faturat e secilit prej jush”. Vendimi i rregullatorit të energjisë për liberalizimin e tregut të energjisë do të hyjë në fuqi më 1 qershor. Përfaqësuesit e bizneseve thonë se janë kundër, pasi nuk janë bërë përgatitjet e nevojshme për këtë ndryshim. Ata kërkojnë që ky vendim të shtyhet për një vit. Nga kjo nismë preken të gjitha kompanitë me mbi 50 të punësuar apo që kanë qarkullim vjetor mbi 10 milionë euro. Ato nuk do të furnizohen më me energji përmes tarifave të rregulluara, por duhet të gjejnë vetë furnizuesin e tyre në tregun e lirë. Nëse nuk arrijnë ta bëjnë këtë, ato kalojnë automatikisht në treg të hapur me çmime të parregulluara.