Ministria e Shëndetësisë në Kosovë njoftoi se në 8 prill do të nisë vaksinimi kundër koronavirusit i qytetarëve mbi moshën 85-vjeçare. Vaksinimi për këto mosha do të bëhet në Prishtinë, në sallën 1 Tetori dhe në komunat tjera të Kosovës. Pas imunizimit të kësaj kategorie, do të vijojë në 11 prill vaksinimi i personave të moshave 80-84 vjeç. Nga sa mësohet në njoftimin e kësaj ministrie, individët e kësaj grupmoshe do të kontaktohen në telefon, bazuar në të dhënat që kanë dërguar në faqen e aplikimit për vaksinim. Kosova e nisi në 29 mars fushatën e imunizimit kundër koronavirusit pas pranimit të 24.000 dozave të vaksinave të kompanisë AstraZeneca, përmes programit COVAX, skema e Organizatës Botërore të Shëndetësisë për shpërndarje të vaksinave në vendet e varfra.Agjencia për Fëmijë e Kombeve të Bashkuara, UNICEF, njoftoi se gjatë muajit maj Kosova do të furnizohet edhe me 76.800 doza të vaksinës kundër COVID-19.Në total, Kosova nga COVAX-i do të marrë falas 100.800 doza të vaksinës së AstraZenecas.