Komisionerja e Bashkimit Evropian për Zgjerim, Marta Kos, ka uruar kryeministrin në detyrë të Kosovës, Albin Kurti, për fitoren në zgjedhjet e parakohshme, duke vlerësuar njëkohësisht procesin zgjedhor si të qetë, gjithëpërfshirës dhe të rregullt. Përmes një reagimi në rrjetin social X, Kos theksoi se pas përfundimit të procesit zgjedhor, forcat politike në Kosovë duhet të bashkëpunojnë për të garantuar stabilitet institucional dhe për të avancuar agjendën evropiane të vendit. Ajo nënvizoi se rruga e Kosovës drejt Bashkimit Evropian kërkon kompromis dhe bashkëpunim politik, ndërsa shprehu gatishmërinë për të intensifikuar angazhimin me institucionet e Kosovës në funksion të integrimit evropian dhe zbatimit të Planit të Rritjes të BE-së. Kosova vazhdon të mbetet në procesin e afrimit me Bashkimin Evropian, ndërsa Brukseli ka theksuar vazhdimisht rëndësinë e reformave, dialogut politik dhe forcimit të institucioneve demokratike. Por, 3 palë zgjedhje në 16 muaj kanë vështirësuar këtë proces, pasi palët politike nuk gjejnë konsensus për zgjedhjen e presidentit.