Partitë politike të regjistruara në Kosovë, janë të detyruara që deri më 7 maj, të njoftojnë Komisionin Qendror të Zgjedhjeve për pjesëmarrje ose mospjesëmarrje në zgjedhjet e parakohshme për Kuvendin e Kosovës. Sipas Komisionit Qendror të Zgjedhjeve, kjo vlen për 53 partitë politike që aktualisht janë të regjistruara si parti politike në Kosovë, dhe jo për subjektet politike që duan të marrin pjesë në zgjedhje si nisma qytetare apo kandidatë të pavarur. Gjithashtu, partitë duhet të informojnë KQZ-në brenda afatit të përcaktuar nëse planifikojnë të garojnë në kuadër të ndonjë koalicioni. Sipas KQZ-së, koalicioni mund të ndërtohet nga së paku dy parti politike dhe sipas ligjit, partia politike nuk mund të tërhiqet nga koalicioni pasi të jete certifikuar derisa rezultati i zgjedhjeve të certifikohet nga ana e KQZ.