Kriza politike për konstituimin e Kuvendit vijon në Kosovë. Kryeministri Albin Kurti, teksa ndodhej në IStog për vendosjen e gurthemelit të projektit të Banimit të Përballueshëm dhe Social, në një reagim për gazetarët mëngjesin e kësaj të mërkure, tha shkurtimisht, “Njëherë Kuvendi, mandej Qeveria”. Kryenministri ka injoruar pyetjet e gazetarëve për ngërçin në Kuvend para dhe pas çdo seance të Kuvendit të Kosovës për konstituimin e Albulena Haxhiun si kryeparlamentare. Sakaq, deputeti i PDK-së, Rashit Qalaj ka deklaruar se Partia Demokratike e Kosovës nuk ka asnjë shqetësim që nuk ka marrë letër nga Albin Kurti për bashkëpunim. Ai theksoi se qëndrimi i partisë së tij është i qartë: nuk do të ketë koalicion me VV-në, as tani, as në të ardhmen. Në seancën e të martës së 29 prillit, në përpjekjen e tetë të Kuvendit për t’u konstituuar, Albulena Haxhiu për të gjashtën herë nuk mori votat e nevojshme për postin e kryeparlamentares.