Raportuesi për Kosovën në Parlamentin Evropian, deputeti Riho Terras, e ka cilësuar në draft-raport, vitin 2025 si një vit të humbur për Kosovën për shkak të bllokadës politike e institucionale që kishte mbizotëruar përgjatë gjithë vitit. Raportuesi estonez ka shprehur më tej keqardhje edhe për dështimin e Kuvendit për të zgjedhur presidentin e ri brenda afatit kushtetues, gjë që e çon vendin drejt zgjedhjeve. Terras gjithashtu ka thënë se është në dijeni për dekretin e Osmanit për shpërndarje të Kuvendit. Deputeti europian thotë se Kosova ka bërë përparime të dukshme në reforma zgjedhore, qëndrueshmëri ekonomike dhe në mbrojtjen e të drejtave themelore, por pavarësisht këtyre, sipas Terras sfidat vazhdojnë të mbesin në reformën për drejtësi, liri të mediave, efikasiteti i administratës publike dhe digjitalizim të shërbimeve publike.