As 24 orë nuk kanë zgjatur bllokadat serbe në veri të Kosovës, të cilat u vendosën mbrëmjen e së premtes për tu hequr pasditen e së shtunës. Lajmi është dhënë nga vetë ministri i Brendshëm Xhelal Sveçla, i cili nga ana tjetër lajmëroi njëherësh edhe hapjen e pikave të kalimit kufitar në Mërdare dhe Bërnjak. “Pas pranimit të njoftimeve se tashmë janë larguar bllokadat e krijuara nga ekstremistë të maskuar që kanë qenë të vendosura dje në territorin e Serbisë dhe duke parë se nuk ka ndonjë pengesë për qarkullim nga dhe drejt pikave kufitare të Republikës së Kosovës, morëm vendimin për hapjen për qarkullim të pikave kufitare Merdarë dhe Bërnjak. Rend dhe ligj, paqe e siguri, cep më cep e në çdo kufi të Republikës tonë”, ka shkruar Sveçla në Facebook. Qëndrimi i ekstremistëve të maskuar serbë erdhi pas mbylljes së zyrave paralele serbe në veri të Kosovës nga qeveria Kurti. Kryeministri është shprehur se ato vijonin të qëndronin në kundërshti me kushtetutën e Kosovës, respektimi i së cilës është detyrë e çdokujt që jeton brenda këtyre kufijve. Për këtë ai ka shprehur vendosmërinë në respektimin e saj, si me mbylljen e zyrave paralele, ashtu edhe me hapjen e urës së Ibrit. Këto vendimi janë konsideruar të pakoordinuara nga ndërkombëtarët dhe të njëanshme.