Arrestime, dorëheqje, ndryshim krahu, përpjekje për të asgjësuar provat e paligjshmërive. Pas humbjes në zgjedhje të ish-"njeriut të fortë" të Serbisë, Aleksandar Vuçiç, lajmet kanë vërshuar me një ritëm të tillë, saqë është krijuar një faqe interneti e quajtur "kolapsi i sistemit", ku inteligjenca artificiale i përditëson informacionet në kohë reale. Që nga disa gjimnazistë që kapën drejtorin e shkollës duke u përpjekur të asgjësonte dokumentacionin, e deri te mbyllja e një banke që besohet se lidhet me Partinë Përparimtare Serbe të Vuçiçit, këto zhvillime e kanë mbërthyer opinionin publik në Serbi gjatë javës paszgjedhore. Raportimet, disi kaotike, shihen si shenjë se sistemi i pushtetit, i ndërtuar nga Vuçiçi, po shembet shpejt. Fituesit nga "Lista e Studentëve" ende nuk e kanë marrë zyrtarisht pushtetin, megjithatë, ndryshimi drastik në ekuilibrin e forcave po bën që ngjarjet të zhvillohen ende pa u finalizuar ndërrimi i pushtetit. Pavarësisht humbjes në zgjedhje, një Vuçiç sfidues ka vazhduar të shfaqet rregullisht në mediat që i qëndrojnë besnike, duke e akuzuar lëvizjen e udhëhequr nga studentët për "terror revolucionar". Të dielën në mbrëmje, Vuçiçi deklaroi për televizionin "Pink": "Natyrisht, kjo është e vështirë por unë jam gati për gjithçka dhe do t'i bëj ballë çdo gjëje". Duke mohuar çdo lidhje me krimin, Vuçiçi tha se nuk ka frikë nga një arrestim i mundshëm, pasi nuk do të ketë asnjë provë kundër tij. "Ata nuk kanë asgjë", tha ai. Mes zyrtarëve të arrestuar deri më tani janë shefi i policisë kriminale të Vuçiçit, Marko Kriçak, si dhe një zyrtar tjetër i lartë policor; të dy dyshohen për shpërdorim detyre. Të hënën, autoritetet ndaluan gjithashtu Davor Macurën, pronarin e bankës private "Alta Bank", e cila besohet se ka lidhje me partinë e Vuçiçit. Ai dyshohet se ka tentuar të përvetësojë miliona dollarë dhe përballet me akuza për shpërdorim detyre. E ndërsa pritet formimi i qeverisë së re, fituesit e zgjedhjeve i kanë bërë thirrje prokurorëve e gjyqtarëve që të bëjnë detyrën e tyre ose të largohen nga postet. Sipas lëvizjes, afati i skadencës së vucicit ka kaluar dhe gjithcka e ngritur prej tij tani do të shembet si gurët e dominosë.