Agjencia e Mediave Audiovizive (AMA) dhe Qendra Europiane për Lirinë e Medias (ECPMF), dhe organizata kombëtare e ndërkombëtare të medies, konsiderojnë sulmin me armë ndaj ambienteve të Top Channel, ku humbi jetën një prej punonjësve të sigurisë Pal Kola, si sulm ndaj fjalës së lirë dhe demokracisë. AMA thekson se “Goditja e një mjedisi mediatik është një goditje ndaj demokracisë, ndaj lirisë së fjalës dhe mendimit”, teksa shpreh ngushëllimet për humbjen e jetës së punonjësit të sigurisë. Ndërkohë kërkohet nga organet ligjzbatuese që të përparojnë me shpejtësi për zbardhjen e kësaj ngjarje dhe arrestimin e autorëve.