4 ish-krerët e UÇK që po përballen me akuza për krime lufte në Gjykatën Speciale të Hagës, së bashku me mbrojtjen respektive, kanë përfunduar këtë të mërkurë deklaratat e tyre hyrëse. Ish-presidenti Hashim Thaçi, mbrojtja e së cilit ishte e para që paraqiti deklaratën hyrës, në fjalën e tij para trupit gjykues, është deklaruar i pafajshëm për të gjitha akuzat e Prokurorisë. Ish-presidenti i Kosovës tha në gjykatë se është i gatshëm të përballet edhe me këtë sfidë dhe pret të ketë sukses për familjen e vendin e tij. Ai u ndal edhe tek ‘shtëpia e verdhë’, përçka u shpreh se tashmë janë hequr dyshimet dhe bota e di që UÇK-ja e Kosova është e pastër nga këto akuza. Ndryshe nga Thaçi, Veseli nuk foli para Speciales, por u përfaqësua vetëm nga avokati i tij, Ben Emmerson. Ky I fundit u shpreh se kundër Kadri Veselit nuk ka asnjë provë e as dëshmitarë se ai ka kryer ndonjë prej veprave me të cilat po akuzohet nga prokuroria. Emmerson, tha se mbrojtja e kundërshton përshkrimin që prokuroria ia ka bërë UÇK-së si organizatë që drejtohej nga lartë poshtë apo që udhëhiqej, administrohej nga individ që thuhej se kanë qenë anëtar të Shtabit të Përgjithshëm të UÇK-së.