Nga viti i kaluar, në greqi është në fuqi java me gjashtë ditë pune ndërkohë që tani pritet të pasojë edhe rregullorja për ditën me 13 orë pune. Sindikatat në vend janë rebeluar dhe kanë shpallur këtë të mërkurë, një grevë të përgjithshme. Ministrja e punës, Niki Keramenos, ka dhënë shumë intervista duke shpjeguar planin e saj. “Synohet vetëm një rregull përjashtues, për vetëm 37 ditë në vit e kjo madje është në interes të punëmarrësve", ka thënë ajo. Sindikatat e Greqisë e refuzojnë planin e ministres dhe po përpiqen të rrëzojnë projektligjin për "fleksibilitetin e kohës së punës", që së shpejti pritet të kalojë në parlament. Të mërkurën sindikatat kanë bërë thirrje për grevë të përgjithshme me qëllim që të paralizojnë Greqinë: Anijet do të qendrojnë të ankoruara në porte, avionët të parkuar në aeroporte dhe ata pak trena që ka, do të mbeten të parkuar nëpër stacione. Që para këtij projektligji, qeveria konservatore e kryeministrit Kyriakos Mitsotakis e bëri tregun e punës në Greqi një ndër më "fleksibilët" në Europë. Që nga korriku 2024 të punësuarit në industri, në tregtinë me pakicë, në bujqësi dhe në disa sektorë të shërbimeve publike duhet të punojnë gjashtë ditë në javë, nëse këtë e vendos sipërmarrësi. Për ditën e gjashtë shtesë paguhet një suplement me 40 përqind të pagës ditore. Në përgjithësi në Greqi gjithmonë ka qenë në fuqi java me 40 orë pune, por sipërmarrësit lejohen të kërkojnë vetëm për një kohë të kufizuar deri në dy orë shtesë pa pagesë në ditë dhe në kompensim u japin pushim punonjësve të tyre, duke u ofruar kësisoj më shumë kohë të lirë. Teorikisht kjo bëhet vullnetarisht, por në sipërmarrje punonjësit detyrohen të punojnë më gjatë e pa asnjë kompensim. Edhe dita me 13 orë pune duhet të ketë në bazë vullnetin e lirë, thekson ministrja e Punës. Askush nuk është i detyruar të punojë orë shtesë, thotë Niki Kerameos. Për shkak se pagat në Greqi janë të ulëta shumë punonjës bëjnë dy punë. Me rregulloren e re mund të mjaftojë që të punohet në një sipërmarrje për 13 orë në ditë. Sipas Eurostat në Greqi punonjësit me 1886 orë pune në vit punojnë më shumë se të gjithë europianët e tjerë. Megjithatë ata kanë produktivitet më të ulët dhe aftësi më të ulët blerëse.