Ndërsa Kosova po i jep fund krizës së gjatë politike, Serbia ngriti para evropianëve çështjen e dialogut mes dy vendeve. Presidenti Aleksandër Vuçiç, takoi në Beograd të dërguarin e Posaçëm të Bashkimit Evropian, Peter Sorensen, ku e cilësoi thelbësor dialogun me Prishtinën, sipas të cilit, duhen plotësuar dy kushte, formimi i Asociacionit të komunave me shumicë serbe dhe mbrojtja e të drejtave të serbëve. “Politika jonë është politika e paqes, e përkushtuar fuqishëm në kërkimin e zgjidhjeve përmes dialogut, por edhe e vendosur dhe e përgjegjshme në mbrojtjen e interesave shtetërore e kombëtare”, shkroi Vuçiç më 26 pas takimit me Sorensen. Ai shtoi se “përpjekja për ndalim” të pjesëmarrjes së Listës Serbe në zgjedhjet e ardhshme në Kosovë tregon se “respektimi i të drejtave themelore dhe lirive të veprimit politik të serbëve është i rrezikuar”. Vuçiç theksoi, gjithashtu, se me Sorensen zhvilloi një bisedë të hapur, të fokusuar në mundësitë për vazhdimin e dialogut me Prishtinën, si dhe mbi sfidat që lidhen me pozitën e serbëve në Kosovë. Shefi i Beogradit e ngriti çështjen e Kosovës edhe në një bisedë telefonike, që zhvilloi të martën, me ministrin e Jashtëm të Rusisë, Sergey Lavrov. Vuçiç tha se e ka njoftuar shefin e diplomacisë ruse për situatën në Kosovë dhe, siç shkroi ai, për “përpjekjet e vazhdueshme për dëbimin e popullsisë sonë nga vatrat shekullore, si dhe për heshtjen e shumicës së bashkësisë ndërkombëtare”.