Është mbyllur votimi në 26 prej 30 përfaqësive diplomatike të Kosovës ku u zhvillua procesi këtë të shtunë. Sipas të dhënave të Komisionit Qendror të Zgjedhjeve, të drejtën e votës e shfrytëzuan mbi 80% e mërgatës së regjistruar si votues jashtë vendit për votim në 18 shtete të botës. “Nga 27.724 votues të regjistruar kanë votuar 80.85 për qind e tyre, apo 22.414 votues. Natyrisht se pas përfundimit të procesit të votimit në katër përfaqësi diplomatike që ndodhen në SHBA dhe Kanada, do të kemi të dhëna të përditësuara për pjesëmarrjen e përgjithshme në votime në kuadër të këtyre 30 përfaqësive diplomatike” Votimi pritet të përfundojë pas mesnatës në përfaqësitë diplomatike të Kosovës në Kanada dhe Shtetet e Bashkuara të Amerikës. Ndërkohë, Komisioni Qendror i Zgjedhjeve ka kryer edhe përgatitjet e fundit para procesit zgjedhor të së dielës që do të zhvillohet brenda vendit. Mëngjesin e së shtunës është shpërndarë materiali zgjedhor, derisa fletëvotimet do të shpërndahen mëngjesin e së dielës para orës 07:00 kur edhe hapen qendrat e votimit. Për mbarëvajtjen e procesit zgjedhor të shtatë qershorit janë angazhuar edhe policia e prokuroria e Kosovës. Sipas njoftimeve, prokuroria ka angazhuar mbi 100 prokurorë që do të jenë kujdestar në ditën e zgjedhjeve, ndërkohë që së bashku me policinë kanë ngritur alarmin për ndërhyrjet e jashtme në zgjedhje. Deri më tani, për tentim të ndikimit të votuesit, institucionet kanë arrestuar tetë persona, të gjithë në Graçanicë, derisa zotohen se do vazhdojnë punën për të ndaluar një kërcënim të tillë. Zgjedhjet e parakohshme parlamentare mbahen pas dështimit të zgjedhjes së presidentit të ri të vendit dhe janë të tretat në një periudhë prej 18 muajsh.