Pas tërmetit që shkaktoi “non –paper” i Bosnjës, një tjetër dokument jo-letër trazon BE-në. bëhët fjalë për një plan të publikuar nga mediat në Kosovë, i cili flet për një marrëveshje finale Prishtinë-Beograd, ku përmendej njohja e sovranitetit territorial të Kosovës dhe Serbisë ndaj njëra-tjetrës si dhe krijimi i një “rajoni autonom të Kosovës Veriore” . Nga përshkrimi, rezulton që një entitet i tillë do të kishte kompetenca gati sa të shtetit. Përdoret termi “Kosovë Veriore”, e jo veriu i Kosovës. Pastaj thuhet se palët, pra Kosova e Serbia, duhet të bëjnë ndryshime kushtetuese që të mund të zbatohet kjo marrëveshje. U pretendua se kjo ishte një nismë franko-gjermane, por ambasadori i Gjermanisë në Kosovë, Jorn Rohde e quajti lajm të rremë që dokumenti të jetë hartuar nga gjermanët dhe francezët. “ Mund të ketë një dokument të tillë, por ai nuk është nga ne”, tha ambasadori, e komentin e tij mohues e përforëcoi edhe ambasada franceze që theksoi se të dy këto shtete mbështesin me forcë ndërmjetësimin e dialogut nga Bashkimi Europian. Vetë BE-ja reagoi së fundi në lidhje me cështjen përmes zëdhënësit, Peter Stano, duke u distancuar krejtësisht nga “non paper” me planin e marrëveshjes Kosovë – Serbi. Dokumenti i pretenduar nuk shpreh pozicionet e BE-së dhe nuk është pranuar nga Përfaqësuesi Special për dialogun, Miroslav Lajçak dhe as nga Përfaqësuesi i Lartë i BE-së për Politikat e Jashtme, Josep Borell”, mësohet të ketë thënë Stano.