33 krime zgjedhore janë duke u hetuar nga Prokuroria e Posaçme kundër Korrupsionit dhe Krimit të Organizuar. SPAK-u e bëri të qartë se është duke ushtruar me përparësi ndjekjen penale për rastet që lidhen me veprat penale në fushën e zgjedhjeve, “Korrupsioni aktiv dhe pasiv në zgjedhje” apo ndaj subjekteve të ndryshëm, që janë kompetencë hetimi të kësaj prokurorie. SPAK njofton se për të gjitha rastet që janë në hetim, “garantojmë subjektet që kanë paraqitur kallëzimet, si dhe opinionin publik se, deri tani janë hetuar dhe në vijim do të vazhdojnë të hetohen me përparësi, me metoda pro-aktive, objektivitet dhe pa asnjë hezitim, deri në sqarimin e plotë të rrethanave të fakteve të pretenduara dhe vënien para përgjegjësisë penale të personave që mund të jenë të përfshirë në veprimtari të kundraligjshme që lidhen me veprat penale të korrupsionit aktiv dhe pasiv në zgjedhje“. Më tek, SPAK bëri thirrje që kushdo që ka të dhëna, fakte apo çdo gjë që mund të ndihmojë në sqarimin e rrethanave të fakteve të kallëzuara është i mirëpritur t’i paraqesë në Prokurorinë e Posaçme, duke i garantuar se do vlerësohen me seriozitetin e duhur dhe do i nënshtrohen hetimit të plotë. Pas njoftimit të tij, nuk vonoi reagimi i ambasadores së SHBA-së në Tiranë, Yuri Kim, e cila e përshëndëti lëvizjen e kësaj strukture e dha një mesazh të qartë për të gjithë. “Shumë gjë e mirë që të shohësh njoftimin e SPAK për hetimet e krimeve elektorale. Unë e kuptoj që prokurorët do të bëjnë të njëjtën gjë. Ata që shkelin ligjin dhe pengojnë të drejtën e qytetarëve për të votuar lirshëm dhe në paqe duhet të ndiqen penalisht. Askush nuk është mbi ligjin.”, u shpreh ambasadorja.