Qeveria e Kosovës e deklaroi hapur se do të punojë për shmangien e kompromiseve që mund të paraqiten në procesin e dialogut me Serbinë për normalizimin e raporteve mes dy shteteve. Reagimi i saj pasoi letrën e presidentit Joe Biden ku theksohej se për normalizimin e raporteve me Beogradin dhe arritjen e një marrëveshjeje përfundimtare gjithëpërfshirëse, kërkohet fleksibilitet dhe kompromise të vështira.“Qeveritë e kaluara kanë krijuar perceptimin se Kosova është e gatshme për lëshime të tjera, pas atyre të pakos së Ahtisarit. Kjo qasje ka dëmtuar marrëdhëniet tona, sidomos me partnerët tanë strategjikë. Ne do të punojmë që të argumentojmë të drejtat tona sovrane. Këtë do ta bëjmë duke ruajtur këtë partneritet. Dëmin e shkaktuar nga qeveritë e kaluara duhet ta zhbëjmë pa shkaktuar dëm të ri”, tha për REL zëdhënësi i qeverisë, Përparim Kryeziu. Të martën, partitë opozitare - Partia Demokratike e Kosovës dhe Aleanca për Ardhmërinë e Kosovës - u shprehen kundër kompromiseve në dialogun me Serbinë, ndërsa Lëvizja Vetëvendosje përmes shefes së Grupit Parlamentar Mimoza Kusari-Lila, u shpreh se qeveria është ajo që e udhëheq dialogun, por për këtë proces duhet të ketë një unitet brenda spektrit politik të Kosovës. Dialogu Kosovë-Serbi ka nisur në vitin 2011 me bisedimet për çështje teknike, ndërsa në 2012-tën, u arrit në bisedime politike për normalizimin e marrëdhënieve. Në një dekadë bisedimesh, besohet të jenë arritur mbi 30 marrëveshje, përfshirë atë të Asociacionit të komunave me shumicë serbe.