Pas Fatbardh Kadillit, ishte radha e ish presidentit Bujar Nishani, një figurë e rëndësishme e PD-së që të dilte hapur kundër Lulzim Bashës e të drejtonte nga ai gishtin e fajit për humbjen në zgjedhjen e 25 prillit, nga të cilat Partia Socialiste doli me një mandat të tretë qeverisës. Me tone tejet të ashpra, Nishani e akuzon Bashën se po e mban peng këtë forcë politike, duke e konsideruar drejtpëerdrejtë përgjegjës për këtë situatë. “Rezultati i zgjedhjeve ishte zhgënjim dhe dëshpërim i madh për votuesit dhe mbështetësit e opozitës si dhe një mundësi e pashfrytëzuar për ndryshimin e shumëpritur. Qeverisja e korruptuar e Edi Ramës do të vijojë të mbajë pushtetin përsëri, pas 8 viteve të skandaleve e dështimeve ! Sot është momenti që Partia Demokratike të çlirohet nga shembulli i paaftësisë dhe modelit që po e asgjeson atë pak nga pak. Sot është momenti që Partia Demokratike të lihet e lirë për tu ringritur në madhështinë që i takon si Parti e Lirisë dhe Rinisë. Sot përgjegjësi kryesor i 4 humbjeve politike rradhazi vendosi ta mbajë peng Shtëpinë e Lirisë në interes të pushtetit të tij personal ! Z. Basha sot duhej të merrte përgjegjësinë e dështimit të tij personal prej 8 vitesh ! Sot Edi Rama mban peng Shqipërinë dhe Lulzim Basha tenton të mbajë peng Partinë Demokratike. Partia Demokratike nuk është pronë personale e një njeriu. Ajo është Shtëpia e Lirisë e qindra mijëra shqiptarëve. Askush nuk do të mundet ta marrë atë peng për asnjë arsye, në asnjë formë e me asnjë çmim ! #MakePDGreatAgain ?? !”, ishte mesazhi i Nishanit, që mbyllej me këtë fjali-jehonë të sloganit të famshëm të ish presidentit amerikan, Donald Trump. Fatbardh Kadilli ishte i pari që doli hapur me kërkesën për largimin e Bashës, të cilin e cilësoi “një model tashmë të shteruar”, ndërsa shpalli kandidaturën e tij për kryetar të partisë.