Gjashtë muaj pas zgjedhjeve parlamentare të parakohshme qytetarët e Kosovës u janë drejtuar sot sërish kutive të votimit. Nga ora 7 e mëngjesit janë hapur vendvotimet në qendrat zgjedhore në komunat e Kosovës, ndërsa të drejtë vote kanë 2 milionë e 92 mijë e 174 qytetarë. Zgjedhjet e reja po mbahen pas dështimit të Kuvendit për të zgjedhur presidentin brenda afateve kushtetuese dhe për qytetarët është hera e tretë brenda më pak se një viti e gjysmë që votojnë në zgjedhje parlamentare. Me vendim të KQZ-së, për zgjedhjet e së dielës janë shtypur 1 milion e 778 mijë e 300 fletëvotime, prej të cilave 1 milion e 605 mijë janë të destinuara për votim të rregullt, 19 mijë e 450 për votim me kusht, 13 mijë e 500 fletëvotime rezervë, si dhe 3 mijë e 500 për votimin e personave me nevoja të veçanta.