Pas një fushate të shpejtë e të gjerë vaksinimi të konsideruar një sukses, autoritetet izraelite njoftuan se në shtetin hebre, mbajtja e maksës në ambjentet e jashtme nuk do të jetë më e detyrueshme. Izraeli me 9.3 milionë banorë mburret se ka imunizuar 54 për qind të qytetarëve të vet me dy doza të vaksinës Pfizer/BioNTech. Të gjitha shkollat janë hapur tashmë, edhe pse Ministria e Arsimit njoftoi se tani pas kthimit të të gjithë fëmijëve në klasa, institucionet arsimore do të inkurajohen për ruatjen e higjienës personale, ajrosjen e ambjenteve dhe mbajtjen e distancës fizike, sa më shumë që është e mundur gjatë pushimeve mes orëve të mësimit. Izraeli i konsideron palestinezët në Jerusalemin Lindor si pjesëtarë të popullsisë së vet, ndaj ka vaksinuar njerëzit edhe atje. Ndërkohë 5.2 milionë palestinezët në Bregun Perëndimor dhe në Rripin e Gazës, të kontrolluar nga Hamasi, kanë marrë një sasi të kufizuar të vaksinave nga Izraeli, Rusia, Emiratet e Bashkuara Arabe, Kina, dhe skema COVAX e Organizatës Botërore të Shëndetësisë, e cila synon të shpërndajë vaksina kundër koronavirusit për vendet e varfra.