Me njoftimin zyrtar të kreut të KQZ-së, Ilirjan Celibashi se PS ka siguruar 74 mandate në zgjedhjet e 25 prillit, mbërritën dhe urimet për kryeministrin Edi Rama nga liderët ndërkombëtarë. Duke nisur me presidenti turk Rexhep Tayip Erdogan , e kryeministri Grek Kiriakos Mitsotakis, të cilët e kanë telefonuar Ramën duke e përgëzuar për fitoren, e cila e bën njëkohësisht që të vendosë një rekord të ri në Shqipëri: deri më sot në këto 30 vite pluralizëm politik, asnjë qeveri nuk kishte siguruar në vendin tonë tre mandate qeverisëse rresht. Urime për rezultatin, kreut të PS-së i kanë mbërritur dhe nga Ministri i Jashtëm Italian Di Maio e nga lideri opozitar, Matteo Salvini. Kryeministri maqedonas Zoran Zaev i ka përcjellë po ashtu Ramës urimin e tij, e madje këtë e ka bërë në gjuhën shqipe. Urimi i parë nga Kosova sakaq erdhi nga kreu i PDK-së në opozitë, Enver Hoxhaj i cili e quante në postimin e tij në FB edi Ramën një mik të cmuar, duke thënë se fitorja e tij “tregon për punën dhe reformat e prekshme që ka bërë ai gjatë këtyre dy mandateve në Shqipëri”.Me rezultatet që dëshmojnë se socialistët kanë marrë mbi 70 vende në parlamentin 140 vendesh të Shqipërisë, kjo u jep atyre komoditetin të qeverisin të vetëm. Në mandatin e vet të tretë, kryeministri është zotuar t`i japë një shtysë të fortë turizmit, energjetikës, bujqësisë e projekteve dixhitale. Zgjedhjet e sivjetshme shënuan të parën herë që votuesit shqiptarë patën mundësinë t`i zgjidhnin edhe individualisht kandidatët përpos partive politike, ndërsa u aplikua po kështu për herë të pare identifikimi elektronik i zgjedhësve.