Ushtruesja e detyrës së presidentes, Albulena Haxhiu, ka deklaruar se pas certifikimit të rezultateve zgjedhore do të zhvillohen takime ndërmjet partive politike për të gjetur një zgjidhje lidhur me zgjedhjen e presidentit. Ajo ka theksuar gjatë një interviste televizive, se fillimisht duhet të përfundojë procesi i numërimit të të gjitha votave, përfshirë ato të emigrantëve, votat me kusht dhe votat me asistencë. “Sapo të mbyllet procesi I numërimit të votave është shumë e rëndësishme që të jepet kontribut dhe të dëshmohet vullnet në mënyrë që të mos përballemi me situata sikur në 2025 dhe në këtë periudhë që lamë pas”, është shprehur Haxhiu. Haxhiu ka vlerësuar se partitë politike duhet të tregojnë gatishmëri për dialog dhe bashkëpunim në këtë proces. Ajo tha se edhe nëse mungon vullneti nga partitë politike, ai do të gjendet. Haxhiu theksoi se kanë shumë dallime në çështje të ndryshme me partitë politike, por se për çështjen e presitentit duhet të ulen dhe të bashkëpunojnë.