Gjykata Themelore në Prishtinë ka dënuar ish-pjesëtarin e ISIS-it, Hysri Selimi me 6 vite burg për spiunazh në favor të Serbisë. Sipas Prokuorisë Speciale, ai ka takuar drejtorin për luftimin e terrorizmit në kuadër të BIA-s Igor Babiq, dhe një zyrtar tjetër të Serbisë, në Vranjë, Nish e Bujanoc, të cilët i informonte në bazë të detyrave që ia caktonin paraprakisht e që kishin të bënin me informacionet lidhur me persona të caktuar dhe zhvillimin e rrymave vahabiste në Kosovë, ndikimin e tyre. Në bazë të akakuzës, Hysri Selimi ka ndihmuar Agjeninë për Siguri e Inteligjencë të Serbisë BIA. I akuzuari pretendohet se i ka dërguar informata BIA-s serbe edhe lidhur me pjesëtarët e UÇK-së dhe vrasjet gjatë luftës. Prokuroria Speciale pretendon se ai edhe iu bashkua ISIS-it me urdhër të BIA-s.