Kryebashkiaku i Kievit, Vitali Klitschko, ka raportuar shpërthime në qytet, ndërsa kryeqyteti ukrainas u përball me një sulm të ri rus me raketa dhe dronë mëngjesin e të mërkurës. “Më shumë dronë po vijnë mbi kryeqytet. Rreziku nga raketat vazhdon. Mos dilni nga strehimet”, shkroi Klitschko në Telegram. Forcat ajrore ukrainase paralajmëruan më herët se një tufë dronësh dhe raketash ruse ishin nisur drejt Kievit dhe lëshuan alarmin për sulme ajrore në mbarë shtetin. “Presidenti rus, Vladimir Putin aktualisht po kryen sulme me raketa ndaj Kievit”, shkroi në Telegram, Andriy Yermak, shefi i stafit i presidentit ukrainas, Volodymyr Zelensky. Rusia ka intensifikuar shumë sulmet me dronë mbi Ukrainë këto kohë. Më shumë se 2000 dronë u lëshuan mbi vend në tetor, sipas shtabit të përgjithshëm të Ukrainës, një shifër kjo rekord gjatë luftës. I njëjti raport thotë se Rusia lëshoi 1,410 drone në shtator dhe 818 në gusht. Dhe duket se kjo është pjesë e një hovi të ri të forcave ruse. Ato po përparojnë përgjatë vijës së frontit në lindje të vendit. Trupat e Koresë së Veriut i janë bashkuar luftës në anën e Moskës. Dhe me zgjedhjen e Donald Trump për një mandat të dytë si president i SHBA-së, forcat e lodhura nga lufta të Ukrainës po përballen me mbështetjen e pasigurt nga donatori i tyre më i madh ushtarak. Shumica e dronëve rusë që bien mbi Ukrainë janë Shahidë nga Irani. Rusia gjithashtu ka filluar të lëshojë edhe dronë të rremë, pa asnjë ngarkesë shpërthyese, me qëllim që të ngatërrojë njësitë e mbrojtjes ajrore të Ukrainës dhe t'i detyrojë ato të shpërdorojnë municione. Krahasuar me raketat, dronët janë shumë më të lirë për t'u ndërtuar, më të lehtë për t'u lëshuar dhe të dizajnuara për të ulur moralin.