Tonelata me peshq të ngordhur kanë mbuluar një port turistik në Greqi. Prej ditësh banorët e qytetit të Volosit janë përballur me pamjet e frikshme dhe të trishta njëkohësisht në bregdetin e zonës. Ky fenomen ka ndodhur pasi peshqit janë zhvendosur nga habitatet e tyre të zakonshme të ujërave të ëmbla gjatë periudhës së përmbytjeve duke ngordhur menjëherë pas kontaktit me ujin e kripur. Kryebashkiaku i qytetit të Volosit ka kritikuar qeverinë e Kyriakos Mitsotakis për menaxhimin jo si duhet të kësaj fatkeqësie natyrore. Ndërkohë ekipet e bashkisë brenda dy ditëve kanë mbledhur mbi 57 ton peshq të ngordhur dhe kanë kërkuar edhe 7 anije të vogla për të pastruar zonën bregdetare. Vendasit në këtë zonë turistike janë të shqetësuar se kjo situatë do të dëmtojë bizneset e tyre dhe do të ndikojë në uljen e numrit të të huajve që preferojnë turizmin në këtë zonë.