Ministri në detyrë i Punëve të Brendshme, Xhelal Sveçla, ka inspektuar këtë të premte pjesën e kufirit në veri ku javën e kaluar u rrëmbye qytetari i Kosovës, Milan Vukashinoviq nga xhandarmëria serbe. Sveçla tha se, bazuar në informacionet dhe dëshmitë e mbledhura nga institucionet e sigurisë, tashmë është e konfirmuar se Vukashinoviq është rrëmbyer nga strukturat e Serbisë si kundërshtar i Listës Serbe, duke u shkelur sovraniteti dhe integriteti territorial i Republikës së Kosovës. Ai aktualisht po trajtohet në spitalin e Nishit për plagët e marra gjatë rrëmbimit. “Serbia po dëshmohet çdo ditë e më shumë jo vetëm si shtet agresor ndaj fqinjëve të saj, por edhe në thelb si shtet antidemokratik, pasi që z. Vukashinoviq ende po i mohohet mbrojtja ligjore e cila edhe në vendet më diktatoriale garantohet me ligj.”, shkroi ministri Sveçla në Facebook. Ai shtoi se institucionet e Kosovës po vazhdojnë hetimet intensive për zbardhjen e plotë të rastit dhe identifikimin e të gjithë personave të përfshirë. Sipas Sveçlës, përgjegjësit do të dalin para drejtësisë sapo të përfundojnë procedurat hetimore.