Kryeministri I Kosovës Albin Kurti, ka reaguar lidhur me arrestimin në harkun kohor të rreth një viti të 5 personave të dyshuar për bashkëpunim me Shërbimin Sekret Serb, të njohur si BIA. Sipas Kurtit, arrestimi I 3 shqiptarëve e 2 serbëve të dyshuar për këtë akuzë, është rezultat i operacioneve të suksesshme të udhëhequra nga Agjencia e Kosovës për Inteligjencë, në bashkëpunim me Policinë dhe Prokurorinë. Në një postim në rrjetet sociale Kurti shkruan se këto raste, përveçse dëshmojnë përpjekjet e vazhdueshme të Serbisë për destabilizim, konfirmojnë suksesin e institucioneve tonë në zbulimin dhe çmontimin e rrjeteve të inteligjencës serbe në Kosovë. “Rastet përfshijnë: përpjekje për rishkrim të historisë me qëllim njollosjen e luftës së UÇK-së dhe mohimin e masakrës së Reçakut; infiltrime në organizata ndërkombëtare dhe në qarqe ekstremiste fetare me qëllim dëmtimin e sigurisë dhe imazhit të shtetit. Njëri nga të dyshuarit (A.V.), pas përballjes me dëshmitë, tashmë ka pranuar fajësinë. AKI në bashkëpunim me mekanizmat vendorë dhe ndërkombëtarë, ka treguar efikasitet të jashtëzakonshëm, aftësi të avancuara analitike e operative në mbrojtjen e sovranitetit dhe rendit kushtetues. Ftoj qytetarët të jenë të vëmendshëm dhe të angazhuar në përpjekjet për një Kosovë të qëndrueshme dhe të pathyeshme ndaj çdo forme kërcënimi. Trajtimi i suksesshëm i këtyre rasteve duhet të shërbejë si shembull për rritjen e vetëdijes dhe forcimin e frontit të përbashkët për siguri kombëtare”, ka shkruar ai.