Ministri I Brendshëm i Kosovës, Xhelal Zveçla, i ka hequr shtetësinë, Nikola Vujoviç, me arsyetimin e rrezikimit të sigurisë kombëtare, pasi është bërë pjesë e forcave policore të Serbisë. Lajmi është bërë publik nga vetë Zveçla në rrjetet sociale, teksa thekson se Serbia po punëson shtetas të Kosovës në institucionet e saj të sigurisë dhe inteligjencës. “Në kuadër të përpjekjeve sistematike për destabilizim të brendshëm të Republikës së Kosovës, Serbia ka punësuar shtetas të Republikës së Kosovës brenda institucioneve të saj të sigurisë dhe inteligjencës, akt ky në kundërshtim me ligjet tona dhe cënim i sigurisë sonë kombëtare. Duke pasur parasysh qëllimet agresive të Serbisë ndaj Republikës së Kosovës, adresimi institucional i rasteve të tilla është jo vetëm një çështje e rendit ligjor, por një domosdoshmëri për mbrojtjen e rendit kushtetues dhe sovranitetit shtetëror.”, shkruan Zveçla. Për këtë arsye, ai shton: “Bazuar në legjislacionin tonë përkatës për shtetësi, aktet nënligjore dhe rekomandimet e institucioneve përkatëse, sot kam marrë vendim për privimin nga shtetësia e Republikës së Kosovës për Nikola Vujović, për rrezikim të sigurisë sonë kombëtare si pjesëtar i forcave policore të Serbisë.” Ministri kosovar bën me dije se nuk do të tolerohet asnjë formë e cënimit të sigurisë kombëtare të Kosovës nga kushdoqoftë ai.