Moska u përball me një nga sulmet më të mëdha ukrainase që nga nisja e luftës në shkallë të plotë, pasi rreth 200 dronë u lëshuan drejt kryeqytetit rus. Një rafineri nafte në zonën juglindore të qytetit u godit, duke shkaktuar shpërthime të fuqishme dhe shtëllunga të dendura tymi. Sipas autoriteteve lokale, 17 persona mbetën të plagosur në rajonin e Moskës. Banorët raportuan se pas sulmit në disa zona ranë grimca të zeza që dyshohet se lidhen me produktet e naftës, duke lënë njolla në rroba dhe automjete. Megjithatë, autoritetet e Moskës mohuan fenomenin e ashtuquajtur “shi nafte”, ndërsa u bënë thirrje qytetarëve të mbanin dritaret të mbyllura dhe personave më të rrezikuar të largoheshin përkohësisht nga zona e prekur. Rafineria e goditur për herë të tretë brenda një muaji, u përfshi nga flakët pas sulmit. Video të publikuara në rrjetet sociale tregojnë momentin kur një shpërthim i madh shkëput çatinë e një rezervuari nafte.