Katër ushtarë humbën jetën dhe dhjetëra të tjerë u plagosën në një zjarr në një bazë ushtarake në provincën e Albertës. Kjo është një nga tragjeditë më të rënda në kohë paqeje që godet forcat e armatosura të Kanadasë në territorin e vendit, deklaroi të dielën kryeministri Mark Carney. Ai e bëri njoftimin e rëndë pa dhënë detaje mbi shkakun e zjarrit që ndodhi të shtunën në Bazën e Forcave Kanadeze në Ëainëright."Me pikëllim të thellë konfirmoj, në këtë moment, se katër ushtarakë kanë humbur jetën dhe se familjarët e tyre janë njoftuar," tha Carney nga kryeqyteti Otava, duke shtuar se "dhjetëra të tjerë kanë pësuar lëndime të rënda." "Kjo është një nga tragjeditë më të rënda që Forcat e Armatosura Kanadeze kanë përjetuar në tokën kanadeze gjatë kohës së paqes," theksoi ai. Gjithashtu, zyrtarët njoftuan gazetarët në një konferencë shtypi të dielën se 19 persona janë në gjendje kritike, tetë janë në gjendje të qëndrueshme, ndërsa 12 të tjerë janë trajtuar për plagët e marra dhe janë në gjendje të lëvizin.