Elon Musk ka deklaruar se do t'i japë çdo fëmije në Amerikë një pjesë në SpaceX, kompanisë së tij me vlerë 2 trilionë dollarë, në një kohë kur kompanitë teknologjike përballen me një shqyrtim gjithnjë e më të rreptë lidhur me ndikimin e tyre në shoqëri. "Vitine ardhshëm, do t'i jap një nga aksionet e mia të SpaceX çdo fëmije në Amerikë," shkroi ai në platformën X të hënën. "Ky do të jetë i pari nga shumë të tjerë." SpaceX filloi të tregtohej publikisht vetëm në qershor (dhe realizoi ofertën më të madhe publike fillestare në histori). Aksionet e kompanisë tregtoheshin me rreth 146 dollarë në mbyllje të tregut të premten. Propozimi i Musk ishte i varfër në detaje. Nuk është e qartë se si do të shpërndahen këto aksione te dhjetëra miliona fëmijë amerikanë, apo nëse të gjithë ata kanë të drejtë t'i përfitojnë. Sipas Byrosë së Regjistrimit të Popullsisë në Shtetet e Bashkuara, ka rreth 73 milionë persona nën moshën 18 vjeç; kjo do të thotë se dhurata e mundshme e Musk-ut do të kishte një vlerë prej rreth 10.7 miliardë dollarësh, bazuar në çmimin aktual të aksioneve të SpaceX. Ofrimi i një pjese në tregun e aksioneve për të rinjtë nuk është një ide e re. Këtë muaj, Departamenti i Thesarit regjistroi automatikisht miliona persona nën moshën 18 vjeç në "Llogaritë Trump", një mekanizëm i ri federal për kursime dhe investime, ku fëmijët e lindur mes fillimit të vitit 2025 dhe fundit të vitit 2028 kanë të drejtë të përfitojnë një kontribut qeveritar prej 1,000 dollarësh. Oferta e Musk-ut erdhi si përgjigje ndaj njoftimit të kompanisë "Anthropic" të dielën, se ajo do të dedikojë të paktën 5% të aksioneve të saj, me vlerë 48 miliardë dollarë sipas vlerësimit më të fundit të kësaj kompanie private, për një "Fond të Përfitimit Publik", i cili do të dhurojë fonde për kauza shoqërore.