Përparimi në dialogun Prishtinë-Beograd mbetet kyç në rrugën evropiane të Kosovës, kështu thuhet në rezolutën e miratuar nga Parlamenti Evropian për Kosovën. Rezoluta u miratua këtë të mërkurë me 412 vota për, 174 kundër dhe 58 abstenime. “Vazhdimi i reformave dhe përparimi në dialogun e ndërmjetësuar nga Bashkimi Evropian mbeten kyç në rrugën evropiane”, shkroi në X raportuesi për Kosovën në PE, Riho Terras, pas miratimit të rezolutës. Kosova dhe Serbia nuk kanë zhvilluar dialog të nivelit të lartë që nga shtatori i vitit 2023, pak ditë para sulmit të armatosur në Banjskë. Prishtina zyrtare ka akuzuar Serbinë se mbetet problem pasi po godet mirëbesimin gjatë procesit të negociatave. Sulmi në Banjskë më 2023 dhe ai në kanalin e Ibër-Lepencit më 2024, për autoritetet e Kosovës kanë dëmtuar mirëbesimin në procesin e normalizimit të raporteve, që ka nisur më 2011 dhe që ndërmjetësohet nga BE-ja. Në rezolutë, sipas Radio Evropa e Lirë, thuhet se për shkak të situatës politike, Kosova mund të humbë mjete financiare nga Plani i Rritjes, pasi ekziston frika se Kosova nuk do të jetë në gjendje t’i përmbushë kriteret e nevojshme.