Moti i keq dhe reshjet e dendura të shiut kanë shkaktuar përmbytje në disa qytete në vend, ku situata më problematike paraqitet në Durrës. Mësohet se disa prej akeseve kryesore të qytetit janë bllokuar dhe janë mbushur me ujë. Situata më problematike paraqitet pranë kryqëzimit pranë stadiumit, në rrugën e Currilave, rruga dytësore pranë zjarrëfikëses dhe disa akse të tjera në periferi. Situata e vështirë ka pezulluar për 24 orët në vijim lundrimet e varkave të vogla për peshkim. Sakaq edhe kryeqyteti është përfshirë nga një stuhi shiu, e cila ka vështirësuar qarkullimin e mjeteve, duke krijuar kështu një trafik të rënduar. Grupet e emergjencës së Bashkisë Tiranë bashkë me skuadrat e tjera po punojnë intensivisht për të normalizuar situatën pas shirave të rrëmbyeshëm. Bazuar në parashikimin e motit duke nisur prej orëve të mesditës dhe deri në orët e mbrëmjes reshjet e shiut pritet të jenë me intensitet mesatar dhe të lartë në formën e rrebesheve dhe stuhive shoqëruar me shkarkesa të forta elektrike.