Rreth 60 milionë euro parafinancim nga Bashkimi Evropian, të parashikuara në kuadër të Planit të Rritjes për Kosovën, ende nuk janë disbursuar, ndonëse marrëveshjet janë ratifikuar para dy javësh në Kuvend. Në Bashkimin Evropian konfirmojnë se Kosova ka paraqitur kërkesën për zhbllokimin e këtyre fondeve dhe se procedurat janë drejt përfundimit. Ardhjen e këtyre milionave për Kosovën e presin ndërkohë, pozita dhe opozita. Një zëdhënës i Komisionit Evropian thotë për KosovaPress, se disbursimi i fondeve është i lidhur me disa kushte ndër të cilat; stabiliteti makroekonomik, menaxhimi i shëndoshë i financave publike, transparenca dhe mbikqyrja e buxhetit. Ndërkohë, Kosova ka afat deri më 30 qershor për të përmbushur 13 reforma të parashikuara, për të përfituar fonde të tjera nga Komisioni evropian. Deputeti i Lëvizjes Vetëvendosje, Driton Hyseni, thotë se institucionet janë të interesuara që fondet të disbursohen sa më shpejt, duke pranuar se procesi është vonuar për shkak të ngërçit politik në vend.