Komisioni Qendror i Zgjedhjeve pritet të përmbyllë gjatë mesjavës procesin e numërimit të të gjitha fletëvotimeve nga votimi përmes postës, kështu ka bërë me dije zëdhënësi i KQZ-së, Valmir Elezi, për KosovaPress. Pas përfundimit të këtij procesi ai tha se do të nisë numërimi i fletëvotimeve nga votimi me kusht dhe i votave të personave me nevoja të veçanta. KQZ, ka numëruar rreth 41% të votave me postë deri në orën 15:00 të kësaj të hëne, ku VV rezulton e para me 24,174 vota, LDK e dyta me 5,065 vota, PDK e treta 2,803 vota, ndërsa e katërta pason AAK me 1,788 vota. Në fund, pas përmbylljes së të gjitha këtyre numërimeve, KQZ do të zhvillojë rinumërimin e deri në 10 për qind të vendvotimeve të rregullta, fletëvotimet e të cilave janë numëruar më herët në Qendrat Komunale të Numërimit. Kjo masë thotë zëdhënësi i KQZ-së, është planifikuar si masë kontrolli për të adresuar problemet e evidentuara.