Kryeministri në detyrë, Albin Kurti ka deklaruar se janë të interesuar që pa humbur kohë të hyhet në fazën e ardhshme që është konstituimi i institucioneve të legjislaturës së 11-të. Ai tha se pret përfundimin e numërimit të të gjitha votave dhe certifikimit të rezultateve për të vazhduar me themelimin e institucioneve. Kurti tha se sa më parë që të ndodhë kjo gjë, aq më mirë. I pyetur në lidhje me çështjen e presidentit, Kurti tha se ajo nuk mund të arrihet vetëm, dhe se kërkohet bashkëpunimi me partitë e tjera. “Do të përpiqemi të bashkëpunojmë me opozitën. Qasja jonë është konstruktive dhe shpresoj që kësaj radhe do të ndryshojë qasja e opozitës. Për të ecur përpara ka nevojë të përfundojë faza refuzuese e opozitës”, tha Kurti ndër të tjera. Ai kujtoi edhe “përpjekjet” e kaluara për zgjedhjen e Presidentit, duke thënë se partia e tij ka qenë kreative dhe aktive. Kurti tha se ai kishte ofruar bashkëqeverisje, ndërsa opozita refuzoi.